TALLER DE PAPIROFLEXIA

Hoxe no recreo tocou taller de papiroflexia coa nosa mestra Keshly de 2º de primaria. Grazas a ela, que nos explicou paso a paso a actividade, puidemos elaborar unhas fermosas caixiñas de papel. Moitas grazas Keshly!!

PASANDO A BÓLA. XOGANDO PARA CAMBIAR

Hoxe, todo o alumnado do cole asistiu a un obradoiro sobre o acoso escolar, "Pasando a bóla".

Esta actividade que ofrece un enfoque innovador para abordar o bullying e fomenta a participación activa da comunidade escolar na creación de solucións. A través do xogo teatral, a audiencia non só toma conciencia da problemática, senón que tamén se converte en axente de cambio, construíndo xuntos unha resposta colectiva que promove un ambiente escolar máis seguro e respectuoso.

Neste encontro con Celtia Figueiras, autora do libro "A banda dos insectos", coa colaboración do alumnado voluntario de 4º, 5º e 6º de primaria como actores e actrices, traballamos sobre escenas construídas especialmente para representar as diversas manifestacións do acoso escolar. Trala presentación destas esceas, todo o alumnado converteuse en parte activa do proceso, aportando solucións aos comportamentos observados, encarnando e mostrando tamén as novas solucións propostas como parte da actuación.

OBRADOIRO DE EDUCACIÓN AFECTIVO-SEXUAL

A educación afectivo-sexual é un dereito dos nenos e nenas recollido na OMS. Tal e como contempla a lexislación vixente, é un aspecto a tratar para contribuir ao desenvolvemento integral do noso alumnado.

Dende as primeiras idades, debemos sentar as bases para unha boa educación afectivo-sexual. E que mellor que tratar o tema de forma natural, rigurosa e sen tabús. Para iso contamos cunha especialista neste ámbito, Paula Cajide.

Ao longo da semana, impartiu varios obradoiros nos que se trataron temas acordes coas idades do alumnado ao que ían dirixidos.

Cal é o noso obxectivo?

Que o noso alumnado coñeza o seu corpo e aprenda a coidalo e respectalo, que compartan sen medos as súas inquedanzas e fomentar o respecto e a aceptación.

En definitiva, promover unhas relacións sanas, tanto a nivel físico como emocional.

SEMANA DO AGARIMO

Somos conscientes de que esta actividade é un éxito total entre o noso alumnado. Da gusto ver a ilusión coa que escriben e esperan a súa correspondencia!

Ainda que cada ano quedamos sorprendidos pola enorme participación, este ano non dábamos crédito. Case mil cartas que repartir!!

Vídeo resumo do Día do Agarimo.

8M, DÍA DA MULLER TRABALLADORA

 

Para conmemorar este día ademais de preparar unha selección de libros de interese, aproveitamos para investigar sobre algunhas mulleres que deixaron pegada ao longo da historia.

Aquí tedes unha pequena mostra dos traballos realizados.

Por outra banda, o alumnado de 5º de primaria elaborou un podcast para explicarnos cal é a orixe do 8M. Se queredes escoitalo picade no seguinte enlace: Orixe do 8M

23 DE FEBREIRO, DÍA DE ROSALÍA

Para conmemorar o día de Rosalía o alumnado de infantil asistiu á biblioteca a un recital de poemas.

Tamén elaboramos uns fermosos marcapáxinas. Mirade que chulos quedaron!

 

 

Por último, o alumnado de 3º de primaria elaborou un podcast de recitado de poemas. Se queredes volver a escoitalo pulsade no seguinte enlace. Recitamos a Rosalía.

11 DE FEBREIRO, DÍA DA MULLER NA CIENCIA.NO MORE MATILDAS

Aproveitando a celebración do Día da muller na Ciencia, queremos compartir con vós unha información moi curiosa. Sabedes que é o Efecto Matilda? Mirade o seguinte vídeo e o descubriredes.

                      

Dende o noso cole, queremos unirnos a este movemento de No more Matildas. Por iso, o noso alumnado de 6º está a participar nunhas xornadas de Inspira Steam. Trátase dun proxecto para o fomento da vocación científico-tecnolóxica a través das STEAM (Ciencia, Tecnoloxía, Enxeñaría, Arte e Matemáticas) enfocado principalmente ás nenas, para paliar a desigualdade que existe nestes ámbitos motivada polos estereotipos de xénero.

Ademais, aproveitamos para coñecer e dar visibilidade a científicas tanto do ámbito galego coma do internacional. Para iso, o alumnado de 4º de primaria elaborou un podcast con información sobre algunhas mulleres que cos seus descubrimentos deixaron pegada na historia.

Anímate a coñecelas picando no seguinte enlace! Mulleres científicas.